ماوحشتك

 

مانسيتك

ما نسيتك / ما نسيتك

كنت آخذ

كل تفاصيل تخصك من بعيد

كنت كل مرة أبنسا

يختنق فيني كلام

ويحتضر فيني وريد

ولاجديد

لا جديد إلا العتب

ولا قديم إلا التعب

لك

 عكست ف هالثبات

وقلت صمتك فضتك

وان حكْيك من ذهب

ولا سبب  لا سبب

غير أطلال ٍ تركتي

فوق  صحرا من هدب

قلت أشوفك

والمصيبة

تبت ألم الشوق

نخل ٍ

دام يتساقط رطب

ولا جديد

لا جديد

 إلا العتب

قمت أعاتب كل ما فيني ولا جيتك معاتب

قمت ألطخ هالدروب اللي في خدي أمنيات

من صباح الدمع ألســــــود يوم قلتيها مراتب

لين صار لكل شارع فــــــــي جروحي أغنيات

هذا نا لك تايب من كبـــــــــــرياء الحب تايب

من كثر ماعشت بعد وحاصـــــــــرتني اللاحياة

ما وحشتك ما سرقت النوم من جفن وهدايب

  ما طرت لك في بعادي لحــــــظة ٍ من ذكريات

ماوحشتك

 ما وحشتك

ولا ّ كل ما فات مات

زين قولي

هالقصيد

هالقصيد اللي بذرتي  

في ثراي

وقام طلع

وصار من بعدك نخيل

هالعيون

هالعيون اللي دخلتي

في عماي

وطاح دمع

وطاح شي ٍ مو قليل

هالشعور

هالشعوراللي بيجري

في دماي

وصاح ضلع

وصار نزعه مستحيل

وهالقتيل

هالقتيل

هالقتيل اللي في صدري

ومعْك  نبضه في رحيل

زين قولي

بس قولي

من يعلمهم يموتو ويرجعون لهالحياة..

شكل ثاني وشي جديد

شي جديد إلا التعب

شي جديد إلا العتب

لجل يبقى الحكي فضة

والسكوت من الذهب

لجل يبقى الحكي فضة

والسكوت مْن الذهب

طاري الموت

طاري الموت

الله يصبرني على طاري المــــــــوت

لا صرت أنا مابين قلبك وعقـــــــــلك

تابوت لقيانا ولفراق تابـــــــــــــــوت

ما طلت منك ظلم وشلون عــــــدلك

يوم الزوايا حلم بالصدر مكبــــــــوت

لا بعضك اللي جاد ولا جاد كلــــــــك

عامين صدفة شوف لا حرف لا صوت

(عامين له هالجرح في حضن نصلك)

عامين كن روحي تجي الحلق وتفوت

والعنق هذا العنق مجنون حبلـــــــك

ما كن شلته كن بي الحب منحــــوت

ما كن قلبي طب أو حب قـــــــــــبلك

ببيوت أصبح بك وأمسيك بـــــبيوت

غالي القصيد وأنت شعري رخصلك

ما قول أنا ملـــــــيت دعوات وقنوت

لو عن مـــــــراد القلب سديت سبلك

ما قول  إلا الصبر لا صار للموت

نسخــــــــة وأنا ما بين قلبك وعقلك